一連兩場的“關智斌《The Endless Adventure Live in Hong Kong》演唱會”日前在啟德體藝館開騷。容祖兒、阿Sa蔡卓妍、阿嬌鍾欣潼、霍汶希(Mani)、泳兒(Vincy)、周家怡、鄧小巧、吳千語同老公施伯雄、蔡一智、彭秀慧、楊天宇(Angus)、黎展峯(Andy)、黎峻(Kenneth)、樂隊Locksmiths開鎖佬、Daze In White同The Lemon Ones到來支持。
Kenny以一身紅色閃石西裝，加上一連串勁歌熱舞為演唱會打開序幕，音樂一響起，全場觀眾唔使等encore，自動波企晒起身一齊跳，全場火速變成大型派對現場。跳唱一輪後，Kenny汗流浹背說：“我除咗件衫先，因為呢件褸都真係幾重。”除衫後，台下有女觀眾已急不及待大叫“剝衫”，Kenny即安撫：“慢慢嚟啦前面呢個姐姐，有你想睇嘅嘢嘅。”萬眾期待的“爆肌環節”，唱到《Ready To Go》時，Kenny毫不吝嗇大騷苦練成果，於街頭健身架上做出各種高難度動作，麒麟臂力同腹肌零死角全面展示，這個視覺盛宴令到全場粉絲血脈沸騰！
唱完幾首歌，Kenny指出道二十三年，由偶像歌手變成……依然是偶像歌手，“唔易㗎，要keep住！今次有機會可以搞到一個真真正正屬於關智斌嘅演唱會，真係好開心，因為我覺得除咗你哋平時喺唔同媒體認識我，今次我可以用另外一個形式去呈現，究竟關智斌係一個乜嘢嘅人？”他笑言：“我都知我嘅偶像包袱比較重，所以今晚我就諗住一層一層咁樣撕開佢、一層一層咁開佢畀你哋睇。”
相識二十年的薛凱琪(Fiona)專程由北京返香港做嘉賓，二人合唱《南昌街王子》及《奇洛李維斯回信》，回憶即刻返晒嚟。二人對話笑料不斷，當Kenny知道Fiona做完嘉賓當晚即飛走後，Fiona突然搞gag，“我願意為你周圍奔波呀，因為你係關智‘奔’呀，即係你係好忙嘅關智‘奔’呀，奔波呀，哈哈。” Fiona又自爆話有次跟Kenny食飯傾事業，傾到差點以為Kenny想追求自己，“我真係差啲以為你想追我呀，哈哈，我係唔會接受你㗎！” 誰知Kenny竟然完全不記得這件事，激到Fiona大叫：“得一次咋喎！同你食飯！”
发表于 2025-9-28 02:46:30
關智斌爆肌惹女粉尖叫
與薛凱琪深情合唱
Kenny載歌載舞
Kenny得容祖兒、薛凱琪與Twins撐場。